迷你芥末魚柳包

你鍾意漢堡包嗎?我就好鍾意啦~

一直都想自己整架!所以就的起心肝去整啦!

今次整左迷你版0既芥末魚柳包~

芥末醬的用地捫新出0個隻!我好鍾意!推介俾喜歡WASABI 0既你~

而魚柳我就買左鯛魚柳0黎整~佢比較實,炸起上0黎比較易操作!而且質感唔錯!

材料(10-12個迷你漢堡包):

*高筋麵粉 250G

*奶粉 7G

*糖 30G

*鹽 1G

*蛋 38G

*水 125G

牛油 30G

芝麻 適量

做法:

1.將*材料搓成麵糰後加入牛油搓至光滑及有筋性麵糰

2.然後蓋上保鮮紙發酵1小時至2倍大

3.發酵好後將麵糰拍扁排氣,分成40-50G一份,然後滾圓,蓋上保鮮紙鬆弛20分鐘

4.鬆弛後再滾圓,然後放於焗盆上,蓋上保鮮紙發酵30分鐘

5.最後於麵糰上掃上蛋液(份量外),然後灑上芝麻

6.放入已預熱190度焗爐焗15-20分鐘即可

**魚柳我0係惠康買急凍的,一塊我切件後用胡椒粉同少許鹽略醃。然後黏上麵粉-->蛋液-->麵包糠,再放入熱油中炸至金黃色

**麵包橫切開,放入魚柳,生菜,芥末醬就可以了啊!!!

點心放題@國金軒

生日0個日除左去食ATUM DESSERTANT 之外,仲PLAN左去國金軒任食點心!

我地去左美麗華0個間~一早已經BOOK左位了!

因為係平日時間,所以唔係好多人~

我地今次試任食點心!呢個就係MENU,睇落款式都唔算太多

第一輪我地點左芋角,黑松露野菌餃,蝦餃同小籠包仲有個菜餃。

WAITER見我地兩個人,所以都幫我地安排每款2件先!

每款都熱辣辣送上啊! 小籠包皮夠薄,唔錯! 黑松露餃較清淡~

之後仲叫左春卷,蓮藕餅,蛋撻,蝦腸,咖哩魷魚,燒賣,咸水角

個人認為最好食係有蝦0既點心!蝦夠大隻同爽口! 另外酥皮蛋撻也不錯啊!!

不過就覺得腸粉每次最少都有3條就多左啲...我地兩個人食碟已飽飽! 加上佢有1/3 係腸粉款式,所以真係少左好多選擇!

最後叫左個楊枝金露,好好味!但由於趕去食甜品畫...只能食一個就算了...

總結: 服務同環境都好好!食物亦唔錯! 有機會0既話下次再去飲茶,試下其他特式點心!

價錢埋單加一加茶芥: 約$712 /2人

椰香奶酥吉士吐司

呢個加左吉士醬去搓0既吐司已經整過幾次了!

雖然它是軟軟的,十分吸引!但始終吐司在我家中真係冇咩吸引力...所以都少整...

只係有時掛住佢,所以先整下~今次我仲加左之前0係台灣買0既椰香奶酥醬!效果唔錯啊!!

材料:

*蛋黃 1個

*糖 10G

*低筋麵粉 15G

*牛奶 65G

高筋麵粉 265G

糖 30G

鹽 1G

水 100G

乾酵母 4G

無鹽牛油 25G

做法:

1.將*材料拌勻,然後加入小鍋中以細火邊攪邊煮至開始有少許凝固便離火,然後繼續攪拌至拌成吉士醬。待涼後用

2.然後除牛油外將其餘材料加入已放涼的吉士醬搓至成麵糰後加入牛油繼續搓至光滑有筋性的麵糰

3.搓好後蓋上保鮮紙發酵1小時至2倍大

4.發酵好後,將麵糰拍扁排氣,分成3等份

5.每份麵糰桿長後,搽上椰香奶酥醬,然後卷起,放入吐司模內,蓋上保鮮紙發酵30分鐘

6.最後於包面上搽上蛋液(份量外),放入已預熱190度焗爐焗30分鐘即可

**煮吉士醬不要煮太耐,剛開始凝固就要離火了!因離火後0既熱力會繼續令佢凝固啊

**我就是用下面這罐椰香奶酥醬了!很濃郁的奶油味,仲有椰絲~搽麵包和造麵包也不錯!

甘荀合桃忌廉芝士包

之前以為用忌廉芝士做包餡會唔好食~一直都唔敢試...

但近排整包開始腦閉塞,唔知整咩好!所以就一於試下啦~

出0黎0既效果係好好喎! 老公同阿爸都大讚話好食!!

大家不妨試下呀:)

材料(9個份):

甘荀蓉 75G 

高筋麵粉 300G

蛋 38G

無鹽牛油 30G

糖 30G

鹽 1G

水 100G

乾酵母 4G

合桃粒 適量

餡材料:

忌廉芝士 160G

糖 30G

餡做法:

忌廉芝士放軟後加糖拌勻即可

做法:

1.將所有材料加入麵包機中,然後用DOUGH MODE 搓約25分鐘,然後熄機。麵糰就咁放入面發酵1小時至2倍大

2.將麵糰取出,排氣,分9份,滾圓後蓋上保鮮紙鬆弛20分鐘

3.鬆弛後,每份麵糰壓扁後包入約1大湯匙餡料

4.包好後放於焗盆上,蓋上保鮮紙發酵30分鐘

5.發酵完成後,於麵糰上灑上高筋粉(份量外),用刀片界2下,最後放入已預熱190度焗爐焗20分鐘即可

**甘荀蓉我係將甘荀去皮切小塊後150G,加水30G去打做蓉 (呢個份量做到2-3次左右)

韓式炸醬麵

睇韓劇成日都見到佢地食炸醬麵,黑蚊蚊咁,但又好似好好味!

一直都想試架...但我又好似未試過~去到韓國都冇試過...

但未試過,我又走去買野學人整!所以都唔知係咪咁0既味道..

之不過我自己覺得好味就得啦! 大家都可以自己再調校下個份量架~:)

今次用0既配料都係我自己隨意加~大家鍾意食咩就加咩啦

好簡單又好味呀~

材料:

麵條 100G

薯仔(去皮切粒) 50G

甘荀(去皮切粒) 50G

魚餅(切粒) 2塊

*春醬 2湯匙

*韓國辣椒醬 1湯匙

*糖 3小匙

*水 200ML

青瓜絲/蛋絲 適量

做法:

1.大鍋中將水煮滾後加入麵糰煮熟,然後撈起過冷河

2.將*材料拌勻備用

3.下少許油於鑊中燒熱加入薯仔,甘荀及魚餅粒略炒至半熟

4.加入*材料拌勻,再煮至薯仔及甘荀熟透及汁至稠 (如果汁杰左但薯仔及甘荀粒未熟的話,可以加返少少水再煮)

5.煮好後淋於麵條上,放上青瓜絲及蛋絲拌勻便可:)

*今次我用0既麵條係呢隻韓國烏冬,超愛的!彈牙~~好味! 我0係荃灣千色店買:)亦都可以0係0個到買埋春醬啊!

紅菜頭提子合桃包

我一直好想用紅菜頭0既整麵包!因為佢個色真係好靚~睇見都開心!

參考左人地0既RECIPE,知道應該用大概幾多份量之後,就開工啦~

呢個RECIPE暫時只可以機搓...因為都幾濕下,但出0黎0既效果好好~好軟!

屋企人好快清晒!

下面0既相係發酵好,預備焗0既:)

材料:

紅菜頭蓉 75G 

高筋麵粉 300G

蛋 38G

無鹽牛油 30G

糖 30G

鹽 1G

水 100G

乾酵母 4G

合桃粒 適量

提子乾 適量

做法:

1.將所有材料加入麵包機中,然後用DOUGH MODE 搓約25分鐘,然後熄機。麵糰就咁放入面發酵1小時至2倍大

2.將麵糰取出,排氣,分4份,滾圓後蓋上保鮮紙鬆弛20分鐘

3.鬆弛後,每份麵糰桿成橢圓形後,卷起成欖形

4.卷好後放於焗盆上,蓋上保鮮紙發酵30分鐘

5.發酵完成後,於麵糰上灑上高筋粉(份量外),用刀片界3下,最後放入已預熱190度焗爐焗20分鐘即可

**紅菜頭蓉我係將紅菜頭去皮切小塊後150G,加水30G去打做蓉 (呢個份量做到2-3次左右)

蟹柳吞拿魚沙律包

呢排整得麵包多,但有時整到會腦閉塞...想造形,但又諗唔到!

呢個包就係諗唔到整咩造形,最後就只係畫公仔...

有人話係蜘蛛,有人話小強! 超!我話係蟹就蟹! 藝術0既野,你識咩呀!? 哈哈~

材料:

高筋麵粉 200G

糖 30G

奶粉 6G

乾依士 3G

溫水 100G

牛油 25G

蛋 30G

鹽 1G

好做法:

1.溫水加入酵母中,等10-15分鐘至酵母醒返(如果剛剛新開的酵母就不用了!)

2.之後將溫水及其他材料加入大碗中搓勻成麵糰

3.取出繼續搓至有筋性,麵糰光滑(最好拉到薄膜)

4.之後蓋上保鮮紙發酵1小時至1.5倍大

5.發好後取出拍扁排氣,分做自己想要的份量,滾圓,蓋上保鮮紙鬆弛10分鐘

6.之後就可以每份拍扁,包餡,最後發酵30-45分鐘,入爐180度焗

麵包餡(6個份)

吞拿魚(隔去水或油份) 4湯匙

蟹柳 (切小段撕碎) 3條

沙律醬 30G 

 全部材料拌勻就可以 (其實份量按個人喜好,都是可加可減的)

最後發酵完成後,掃上蛋液,再用沙律醬放入唧袋,剪一小洞唧出自己想畫0既野0係包面,最後180度焗20-25分鐘就OK啦~~

電飯煲綠茶蛋糕

之前見到咁多人用電飯煲整蛋糕,仲以為個飯煲要有焗蛋糕功能先整到...

亦見到咁多人買0個個班蘭蛋糕粉,以為要預拌粉先整到...

一直以來都係用焗爐整蛋糕,所以對電飯煲整都有點興趣!

前幾日俾我見到原來普通飯煲都可以整到架!

好似發現新大陸咁~一於就試下我家電飯煲得唔得先!!

**我倒個蛋糕出0黎時,我未整鬆晒...結果有啲痴住左個煲..爛左...張相係我合返埋先影0既...T^T 大家拎蛋糕出0黎時最好用膠刮鬆下先啊!!

材料:

蛋黃2隻

糖(A) 30G

牛奶 30ML

油 30ML

低粉 60G

綠茶粉(可轉其他粉) 6G

蛋白3隻

糖(B) 30G

做法:

1.將蛋黃加糖(A)打至淡黃色,然後加入牛奶及油拌勻

2.再篩入低粉及綠茶粉拌勻

3.另一大碗中,將蛋白打至起泡後將糖(B)分2次加入打至企身

4.然後將1/3打好的蛋白拌入蛋黃糊中輕手拌勻,再加入剩餘的蛋白拌勻

5.倒入飯煲中按制(我家飯煲只有一個制..就係煮飯),約5分鐘就會跳起,不要打開蓋,就咁放10分鐘

6.然後按第2次制,約3-4分鐘會跳起,不要打開蓋,等15分鐘就可以打開! 如果插支牙簽入去蛋糕冇野痴住就完成啦!:)

**我0既飯煲係17CM~所以蛋糕0既高度剛剛好!如果飯煲大點就會扁身啲

椒鹽雞翼

近來好忙...而家先打到個RECIPE....

材料:

雞翼(我打直剪開變做單骨雞翼)10隻 

低筋麵粉 1/2杯

 醃料:

胡椒粉 1茶匙

鹽 1/2茶匙

糖 1茶匙

配料:

蒜頭(切小粒) 3湯匙

炸蒜粒 3湯匙

指天椒(切粒) 1隻

1.雞翼加醃料醃1小時

2.將低粉倒入袋中,加入雞翼,然後CHOK勻至雞翼均勻地沾上麵粉

3.鑊中倒入適量油燒熱,加入雞翼炸至金黃色撈起,等10-20秒後再回鑊炸20-30秒左右撈起隔乾油份,放於隔油紙上備用

3.另一鑊中加2湯匙油燒熱,加入蒜粒及辣椒碎炒至微黃後加入炸蒜及雞翼兜勻,最後加入椒鹽兜勻即可 

**其實椒鹽份量我只係大約,我買一支支橙色蓋0個隻,大約灑3-4下左右 :P

紫菜吞拿魚肉鬆卷

你地有冇咩包特別鍾意食呢?

我細個好鍾意腸仔包~之後鍾意腿蛋包~慢慢就好多包都鍾意!

其中一款係呢個紫菜吞拿魚肉鬆卷! 好耐之前整過一次~

今次係第2次整:)

麵糰材料(6個份):

高筋麵粉 200G

糖 30G

奶粉 6G

乾依士 3G

溫水 100G

牛油 25G

蛋 30G

鹽 1G

其他材料:

壽司紫菜 2塊

肉鬆 適量

沙律醬 適量

餡材料:

吞拿魚(隔去水或油份) 4-5湯匙

沙律醬 7湯匙 

烚蛋(只要蛋白,切粒) 3隻

做法:所有材料拌勻即可

做法:

1.溫水加入酵母中,等10-15分鐘至酵母醒返(如果剛剛新開的酵母就不用了!)

2.之後將溫水及其他材料加入大碗中搓勻成麵糰

3.取出繼續搓至有筋性,麵糰光滑(最好拉到薄膜)

4.之後蓋上保鮮紙發酵1小時至1.5倍大

5.發好後取出拍扁排氣,分做2份,滾圓,蓋上保鮮紙鬆弛20分鐘

6.之後每份桿成23CM X 23CM的正方形,放於焗盆內(我用23CM X 23CM的焗盆),蓋上保鮮紙發酵30分鐘

7.放入已預熱190度焗爐焗15分鐘

8.出爐稍放涼後,麵包底部(就是較平滑的那一邊)均勻搽上沙律醬,然後放上一塊壽司紫菜貼實

9.貼好後,反轉麵包,均勻放入餡料,然後就好似卷ROLL咁卷埋

10.頭尾切走,然後切3份

11.每份頭尾搽上適量沙律醬,再黏上肉鬆即可

雞尾包

有椰絲0既包,都係我爸媽喜歡0既! 相反...我就麻麻地~

今次整呢個雞尾包,都係應我媽要求~又係要多餡

雞尾包都只係用返之前爆餡椰檳做法ja...

我今次整左6個,但就餡真係多左啲...

材料(一盆6-7個份)

湯種做法:

高筋麵粉50G加水250G拌勻後邊攪邊煮至65度杰身,蓋上保鮮紙(要緊貼住湯種表面),放涼後放雪櫃雪一晚,用時取出回溫

餡材料:

椰絲 100G

糖 55G

蛋 30G

無鹽牛油(室溫放軟) 30G

做法: 將所有材料拌勻,分成6等份即可

墨西哥油(包面用):

牛油(放軟) 35G

低筋麵粉 25G

糖 10G

做法:將糖及牛油打勻後加入麵粉拌勻即可

麵糰材料:

*高筋麵粉 187G

*糖 30G

*奶粉 6G

*乾酵母 3G

*水 35G

*蛋 30G

*鹽 1G

*湯種 87G

牛油 25G

做法:

1.將*材料搓成糰後加入牛油搓至光滑有筋性的麵糰,之後蓋上保鮮紙發酵1小時至兩倍大

2.發酵好後將麵糰拍扁排氣分6份,滾圓,蓋上保鮮紙鬆弛20分鐘

3.將麵糰桿開成長方形,包上一份餡料然後卷起收口,放於焗盆上

4,蓋上保鮮紙,再發酵30分鐘

5.發酵好後,掃上蛋液,灑上芝麻及唧上墨西哥油

6.最後放入已預熱190度焗爐焗15分鐘即可

蝴蝶酥

前幾日見表姐整0既蝴蝶酥咁靚,令到好怕整酥皮0既我心郁郁想整!

於是問表姐拎左RECIPE~佢亦俾我整理好後放上0黎同大家分享:)

一向我就算整酥皮都只係冬天先會整...因為夏天真係熱到連自己都溶埋,何況係包0係入面0既牛油...

加上我對西式酥皮好有恐懼...整10次,有8次都係穿晒...爆晒牛油出0黎!好沮喪!

但今次我一於少理~開行冷氣快手整完放入雪櫃~竟然成功左!超開心呀~~~

材料:

*高筋麵粉 100G

*低筋麵粉 100G

*鹽 1小撮

*牛油 20G

*水 100ML

牛油(包裹用) 140G

砂糖 適量

做法:

1.將*材料放入大碗中搓至混位好成麵糰,於麵糰面上畀十字

2.然後蓋上保鮮紙放入雪櫃30分鐘

3.雪好後,將麵糰桿成十字的形狀,然後包入牛油(包裹用),包好後收口(要包好啲,唔好俾佢爆出0黎呀!)

4.將麵糰桿成長方形,摺4摺

5.打直麵糰再桿成長方形,摺3摺。然後包上保鮮紙放入雪櫃雪15分鐘

6.雪好後,重覆步驟4及5一次

7.將麵糰桿薄至3MM厚,灑上砂糖,然後反轉,再灑上砂糖

8.將麵皮兩邊向中間摺,然後再對摺

9.用刀切成每片1CM厚,放上已鋪牛油紙我焗盆上,再於面上灑上砂糖

10.放入已預熱180度焗爐焗15-20分鐘至金黃色即可

其實打完我都覺得好難明...因為酥皮呢樣野,真係要有圖睇先易明啲...

如果好彩我老公得閒,而我又可以整得成功0既話,就整個VIDEO俾大家睇啦...

芋頭酥

前幾日買左個芋頭,諗緊整咩好,芋頭包定芋頭酥定芋泥卷呢?

最後決定芋頭酥!

因為見到人地整紫色好靚,我都心思思想整呀!

芋頭酥同奶皇酥大同小異~只係材料有少少唔同:)

材料:

油皮材料:

高筋麵粉 55G

低筋麵粉 120G

糖霜 40G

固體菜油/豬油 52G

水 70G

芋頭香油 適量

油皮做法:

1.除水以外,將所有油皮材料加入大碗中揉勻,之後加入水搓勻成光滑麵團

2.用保鮮紙蓋好麵糰,鬆弛30分鐘

油酥材料:

低筋麵粉 175G

固體菜油/豬油 85G

芋頭香油 適量

油酥做法:

將所有材料搓勻成糰即可

芋頭餡料1份,蒸熟咸蛋黃(1隻開4份) 4隻

組合:

1. 將鬆弛好的油皮分做40G一份,將油酥分做30G一份。將餡料分做30G一份,每份包入1份咸蛋黃後搓圓備用
2. 將一份油皮桿薄後加入一份油酥後收口
3. 然後壓扁桿成長形,再捲成筒狀(由下而上/由上而下卷)
4. 然後再壓扁桿成長形,再捲一次(注意:桿的時候,螺旋形卷口是向自己的(即是麵糰是打直的),卷的時候也是一樣)
5. 捲好後蓋上保鮮紙鬆弛30分鐘
6. 鬆弛後,將每一份麵糰切成兩份,切口位向上
7. 將其中一份壓扁,然後包入一份餡料後收口(包的時候,切口那邊是面的,另外,螺旋形要保持於中間啊!)
8. 包好後放於舖上牛油紙我焗盆上,放入已預熱180度焗爐焗25分鐘即可

芋頭餡材料:

芋頭(去皮切粒) 370G

砂糖 65G

無鹽牛油 30G

做法:

將芋頭蒸熟後趁熱加入糖及牛油拌勻放涼即可使用

做法可參考我的奶皇酥VIDEO : https://www.youtube.com/watch?v=luLvWwuv5FA